" إسفين و آسفين " .. شمشون المخلوع
* بعد خروج مبارك من شرم الشيخ استقبلت المدينة فى ليلة واحدة 15 الف سائح على 90 رحلة شارتر وارتفعت معدلات الحجز بالفنادق 70 % .. أريد أن أقترح اقتراحا و أتمنى ألا يفهمنى الثوار خطأ ويتهموننى باننى من الفلول .
* الدعوة لمليونية كبيرة يشارك فيها جميع المصريين بمن فيهم رواد مصطفى محمود وروكسى للمطالبة برحيل الرئيس السابق عن مصر بالكامل .. وأهو يبقى ضربنا عصفورين بحجر .. الاول نريح الارامل بتوع إحنا آسفين ياريس .. والثانى نتخلص من النحس اللى ملازمنا من يوم ما هلت علينا أنواره .. يمكن تحل علينا بركاته وربنا ياخد بادينا والحال ينعدل والاقتصاد يشم نفسه من جديد .
* الرئيس السابق لن يتغير.. وسيظل يعمل بسياسة الارض المحروقة وشعار أنا ومن بعدى الطوفان ليهدم المعبد على من فيه وكأنه شمشون المخلوع .. وبغض النظر عن اختلافنا أو اتفاقنا مع بعض سياسات وطريقة إدارة المجلس العسكرى للبلاد إلا أن كلام محاميه عن مسئولية المشير طنطاوى عن قطع الاتصالات خلال الثورة فانها تدخل فى باب الكهن الذى يجيده مبارك لضرب " إسفين " بين الشعب والجيش .
* الرئيس المخلوع ردت فيه الروح وصحته بقت عال العال وحالته المعنوية اتحسنت .. والعادلى ومساعدوه فى غاية الانشكاح والسعادة .. حاجة من الاتنين .. إما احنا فى فيلم هندى يا إما الناس دى صحتها بتيجى على المحاكمات .. ولو التانية صح .. ربنا يبسطهم كمان وكمان ويجعل ليهم فى كل خطوة قضية .
* فريد الديب من المحامين البارعين وأعجبنى عندما طلب فى الجلسة الاولى لمحاكمة المخلوع الاستماع الى أكثر من 1400 شاهد إثبات والمشير طنطاوى واللواء عمر سليمان وكل المحافظين السابقين لجنوب سيناء ولن أستغرب على الاطلاق إذا طلب فى الجلسة المقبلة الاستماع شخصيا لشهادتى الرئيسين الراحلين جمال عبدالناصر وأنور السادات ومناقشة رأيهما فى حق المتهم بعد الاستعانة بشيخ لتحضير روحيهما على نفقة المحكمة .
* التحية والسلامات التى أداها عدد من ضباط الشرطة والشرطة العسكرية المسئولين عن تأمين محاكمة مبارك ونجليه والعادلى ومساعديه لاركان النظام السابق .. تؤكد أننا
كنا نشاهد مهرجان السلام للجميع وسيظل البعض عبيدا لثقافة " العين ما تعلاش عن الحاجب " .
* هل تغيرت مصر بعد الثورة ؟! كنت أتمنى الاجابة بنعم .. لكن " نأبى جيه على شونة " و التغييرات الاخيرة فى حركة المحافظين أكبر دليل .. محافظ فلول والتانى فى أمانة السياسات والباقيين ... ولا بلاش .. ربنا يجعل كلامنا خفيف عليهم ودستور يا سيادنا .
هشام البسيونى
hatiab@hotmail.com
ليست هناك تعليقات:
إرسال تعليق